सांजा : श्री रामनवमी, हनुमान जन्मोत्सव, रमजान ईद तसेच भारतरत्न डॉ. बाबासाहेब आंबेडकर यांच्या जयंतीनिमित्त सांजा गावामध्ये सर्व रोग निदानासाठी भव्य व सर्वसमावेशक आरोग्य शिबिराचे आयोजन करण्यात आले होते. सामाजिक ऐक्य, आरोग्य जागरूकता आणि गरजूंना मदतीचा हात या उद्दिष्टांमुळे आयोजित या शिबिराला ग्रामस्थांनी अभूतपूर्व असा प्रतिसाद देत मोठ्या संख्येने उपस्थिती लावली.
हनुमंत आप्पा मित्र मंडळ यांच्या पुढाकारातून २ एप्रिल २०२६ रोजी सकाळी १० ते दुपारी ४ या वेळेत हे शिबिर पार पडले. गावातील विविध वयोगटातील नागरिकांनी शिबिराचा लाभ घेतला. विशेषतः ग्रामीण भागातील लोकांना शहरातील महागड्या आरोग्य सेवांचा लाभ मिळणे कठीण असते, हे लक्षात घेऊन या शिबिरात अनेक महत्त्वाच्या तपासण्या व उपचार सवलतीच्या दरात किंवा मोफत उपलब्ध करून देण्यात आले.
या शिबिरामध्ये लहान मुलांच्या हृदयाच्या गंभीर आजारांवर मोफत ऑपरेशन करण्याची घोषणा करण्यात आली असून, गरजू आणि आर्थिकदृष्ट्या दुर्बल रुग्णांसाठी ही अत्यंत दिलासादायक बाब ठरली आहे. तसेच गरीब व गरजू नागरिकांना मोफत चष्म्यांचे वाटप करण्यात आले. विविध प्रकारची मोठी ऑपरेशन्स मुख्यमंत्री सहायता निधीतून मोफत करून देण्याचा प्रयत्न करण्यात येणार असल्याचे आयोजकांनी सांगितले.
याशिवाय, अँजिओग्राफीसारखी महत्त्वाची तपासणी ५० टक्के सवलतीत उपलब्ध करून देण्यात आली. सोनोग्राफी तसेच पायातील नसांच्या तपासण्या (व्हेरिकोज व्हेन्स) देखील ५० टक्के सवलतीत करण्यात आल्या. त्यामुळे अनेक रुग्णांनी या संधीचा फायदा घेत आपली आरोग्य तपासणी करून घेतली.
शिबिरात तज्ञ डॉक्टरांची अनुभवी टीम उपस्थित होती. डॉ. धनंजय पडवळ, डॉ. अजित ढिकले, डॉ. महेश पाटील, डॉ. अश्विनी धनंजय पडवळ, डॉ. वेंकटेश पोलावर, डॉ. धवल कुमार बनसोडे, डॉ. सागर सूर्यवंशी आणि डॉ. स्वप्नील भोसले यांच्या मार्गदर्शनाखाली रुग्णांची तपासणी करण्यात आली. प्रत्येक रुग्णाची सविस्तर तपासणी करून आवश्यक ते उपचार व मार्गदर्शन देण्यात आले. या शिबिरामुळे ग्रामीण भागातील नागरिकांना दर्जेदार वैद्यकीय सेवा त्यांच्या दारात उपलब्ध झाल्या. अनेकांनी प्रथमच आपली तपासणी करून घेतल्याचे सांगितले.
आयोजकांच्या या उपक्रमाचे सर्वत्र कौतुक होत असून, अशा प्रकारचे शिबिरे नियमितपणे आयोजित करण्यात यावीत, अशी मागणी ग्रामस्थांकडून व्यक्त होत आहे.
सामाजिक बांधिलकी जपत आणि विविध सणांच्या निमित्ताने समाजोपयोगी कार्याचा आदर्श ठेवत हनुमंत आप्पा मित्र मंडळाने राबवलेले हे शिबिर सांजा गावासाठी एक प्रेरणादायी उपक्रम ठरला आहे.
यावेळी, हनुमंत (आप्पा )सुर्यवंशी, राजदीप गायकवाड, मुकुंद ( बापू ) सुर्यवंशी, प्रदिप सुर्यवंशी, संदीप कदम, प्रविण (आबा )सुर्यवंशी, सुहास मोहिते, विकास बळी, सिद्दिक तांबोळी , प्रशांत सुर्यवंशी, ओम सुर्यवंशी, अभिजीत सुर्यवंशी, लतिफ शेख , रणजीत सुर्यवंशी, काका कदम, कुलदीप सुर्यवंशी, संतोष सुर्यवंशी, पंकज पाटील, सुदर्शन सुर्यवंशी, धर्मराज सूर्यवंशी, सुधीर चांदणे, महेश पवार, अजय डोंगे, नवाज शेख हे उपस्थित होते.
