धाराशिव : शहरात एक अत्यंत दुर्दैवी घटना घडली असून, बेंबळी जवळील शिवाजीनगर परिसरात बोलेरो पिकअप आणि मोटरसायकल यांच्यात झालेल्या भीषण अपघातात धाराशिव शहरातील परिचित चेहरा व सामाजिक कार्यात सक्रिय असलेले वाजिद पठाण यांचा मृत्यू झाला आहे. मिळालेल्या माहितीनुसार, वाजिद पठाण हे मोटरसायकलवरून धाराशिवकडे येत असताना समोरून येणाऱ्या बोलेरो पिकअप वाहनाने जोरदार धडक दिली. हा अपघात इतका गंभीर होता की, त्यांचा जागीच मृत्यू झाला.
या घटनेनंतर परिसरात हळहळ व्यक्त केली जात असून, स्थानिक नागरिकांनी तातडीने मदतीसाठी धाव घेतली. मात्र, अपघाताची तीव्रता लक्षात घेता त्यांना वाचवणे शक्य झाले नाही. वाजिद पठाण हे सर्वसामान्यांशी अतिशय जिव्हाळ्याचे संबंध ठेवणारे व्यक्तिमत्व होते. विविध सामाजिक उपक्रमांमध्ये त्यांचा सक्रिय सहभाग असायचा. त्यांच्या अचानक झालेल्या निधनामुळे धाराशिव शहरावर शोककळा पसरली आहे.
