शिवसेनेला ‘जय महाराष्ट्र’ करत भाजपमध्ये जाहीर प्रवेश करून धाराशिवकडे परतणारे माजी जिल्हा परिषद उपाध्यक्ष धनंजय सावंत यांच्या गाडीला सोलापूर-पुणे महामार्गावर भीषण अपघात झाला. गुरुवारी मध्यरात्री भिगवणजवळील डाळज २ गावाजवळ एका भरधाव कंटेनरने सावंतांच्या फॉर्च्युनर कारला जोरदार धडक दिली. या अपघातात कारचा अक्षरशः चेंदामेंदा झाला असून, सुदैवाने धनंजय सावंत यांच्यासह त्यांचे सहकारी बालंबाल बचावले आहेत.
नेमकी घटना काय?
मिळालेल्या माहितीनुसार, मुंबईत भाजप प्रदेशाध्यक्ष रवींद्र चव्हाण आणि आमदार राणाजगजीतसिंह पाटील यांच्या उपस्थितीत धनंजय सावंत यांनी आपल्या कुटुंबीयांसह आणि कार्यकर्त्यांसह भाजपमध्ये प्रवेश केला. या प्रवेश सोहळ्याचा आनंद साजरा करून ते फॉर्च्युनर कारने (क्र. उपलब्ध नाही) धाराशिवच्या दिशेने निघाले होते. मध्यरात्रीच्या सुमारास भिगवणजवळ मागून येणाऱ्या एका वेगवान कंटेनरने त्यांच्या गाडीला चालक बसलेल्या बाजूने भीषण धडक दिली.
गाडीचा चक्काचूर, पण ‘देव तारी त्याला कोण मारी’
हा अपघात इतका भीषण होता की, फॉर्च्युनर कारच्या ड्रायव्हर साईडचा पूर्ण भाग चक्काचूर झाला आहे. धडक बसताच गाडी रस्त्याच्या कडेला फेकली गेली. मात्र, एअरबॅग्ज आणि नशिबाची साथ यामुळे धनंजय सावंत यांना कोणतीही मोठी इजा झाली नाही. गाडीचा चालक आणि अंगरक्षक हे दोघे किरकोळ जखमी झाले असून त्यांच्यावर जवळच्या रुग्णालयात उपचार करण्यात आले आहेत.
राजकीय वर्तुळात खळबळ
धनंजय सावंत हे शिवसेना आमदार तानाजी सावंत यांचे पुतणे आहेत. त्यांनी नुकताच शिवसेनेत मोठी फूट पाडत भाजपमध्ये प्रवेश केल्याने धाराशिवच्या राजकारणात मोठी खळबळ उडाली होती. या राजकीय बदलाच्या चर्चेतच त्यांच्या अपघाताची बातमी आल्याने राजकीय कार्यकर्त्यांमध्ये चिंतेचे वातावरण पसरले होते. मात्र, सावंत सुरक्षित असल्याचे समजताच समर्थकांनी सुटकेचा निश्वास सोडला आहे.
